Tsadace Ta Hana Barcelona Sayen Coutinho

Kungiyar Liverpool ta bukaci Barcelona ta biya ta fam miliyan 183 idan tana so ta sallama mata Philippe Coutinho a ranar karshe ta kasuwar saye da sayar da 'yan wasan Turai, in ji daraktan Barca Albert Soler.

Daraktan ya ce abin da ya sa ba su biya kudin ba shi ne "farashin ya yi mana tsada kwarai."

Sau uku Barcelona tana taya dan kwallon, amma sai Liverpool ta yi mata kememe.

Dan wasan ya fashe da kuka bayan wasan Brazil da Ecuador lokacin da ya fahimci cewa kowarsa Barcelona ba za ta yiwu ba, kamar yadda jaridar Daily Express ta bayyana.

Gabanin rufe kasuwar saye da sayar da 'yan kwallon Turai, Liverpool ta taya dan wasan Monaco Thomas Lemar a kan fam miliyan 82, amma sai aka ki sallama mata dan kwallon, kamar yadda Daily Express ta wallafa.

Kungiyar Real Madrid ta amince wa dan wasanta Gareth Bale ya koma Manchester United, amma sai dan kwallon mai shekara 28 ya ki, a cewar jaridar Daily Star.

Manchester City za ta shigar da korafi ga hukumomi kan Arsenal bayan da ta ki sayar mata da Alexis Sanchez a ranar karshe ta kasuwar saye da sayar da 'yan kwallon Turai, in ji jaridar The Sun.

Sai dai tsohon dan wasan Arsenal, Paul Merson, ya ce kulob din ya yi kuskuren rashin sayar da dan wasan, ganin cewa kungiyar tana da bukatar kudin da za ta sayi 'yan wasan baya, kamar yadda kafar yada labarai ta Sky Sport ta ruwaito.

Har ila yau, kafar yada labaran ta ce Man City ta shirya taya Sanchez kasa da yadda ta taya shi idan aka bude kasuwar saye da sayar da 'yan kwallon Turai a watan Janairun badi.

Source: BBC Hausa