Obama Ya Caccaki Trump Kan Hana Musulmi Shiga Amurka

Tsohon shugaban Amurka Barack Obama ya caccaki Shugaba Donald Trump kan matakin da ya dauka na hana Musulmi 'yan wasu kasashe shiga kasar.
Sanarwar da mai magana da yawun Obama, Kevin Lewis, ya fitar ta ce tsohon shugaban ya ji dadin zanga-zangar da ake yi domin tilasta wa Trump ya janye matakin da ya dauka.
Ya kara da cewa Mr Obama yana kyamar nunawa mutane wariya saboda addininsu.
A cewarsa, zanga-zangar da mutane ke yi ta nuna cewa Amurkawa ba za su bari a gurbata mulkin dimokradiyya ba.
'Jakadu sun bi sahu'
Hakan na faruwa ne a daidai lokacin da wasu kafafen watsa labaran Amurka suka ruwaito cewa wasu jakadun kasar a kasashen duniya na shirin caccakar Shugaba Donald Trump a kan takaita dokokin karbar bakin-haure.
Wani daftarin rahoton da jakadun za su fitar, wanda BBC ta gani, ya ambato su suna cewa hana Musulmi shiga kasar ba zai sa ta samu kwanciyar hankali ba.
Sai dai jami'an fadar White House sun ce ya kamata duk wanda ke kyamar wannan matakin ya yi abin da ya ga dama.

Daga BBCHAUSA