Ba Ni Na Kashe Zomon Ba - Rahma Sadau

Ban cika magana akan wani Mutum ko sana'arsa ko aikinsa ko halayyarsa ba, musamman lokacin da kowa  ya ke  qoqarin nuna kwarewarsa wajen iya sharhi, sharri, cusawa wasu haushi, nuna isa  da watsa wa wasu laifi.

Amma dukkan kokarin da na yi na kaucewa maganar Jarumar Wasan  Hausa, wato Rahama Sadau, sai da  na sami kaina ina  rubutu akai.

Dalilai biyu ne suka jawo min rashin hakurin na bar rubutu:

1- Kasancewar dole ne ko mun kin ko mun so akwai wanda  wannan ci gaban nata (koda na mai hakan rijiya) zai burge  shi, kuma yayi fatan  ina  ma shi/ita ma ace ta sami karbuwa da shahara kamar  Jarumar.

Ina ma ace itama har  wani cikin Malamai zai mata nasiha, ta yi watsi da kunnen uwar  shegu da shi, ta kuma je  ta samo Dalolinta ta kara suna, da fitowa da Hausawa filin  'yan rawa da waka da kida a fadin duniya.

Sannan uwa uba ni ma ina da 'ya'ya maza da mata wa'yanda ko yaya za su ji abinda ya faru da ita, su kuma nemi ra'ayina da fahimta ta kan mas'alar.

2- Kuma babban dalilin shine rubutun Malam Yakubu Musa wanda  ya sa tattaunawa ta zo da batun mahaifiyarta ta nuna  bata  goyon bayanta cikin wannan shaharar, amma wai  mahaifinta ne  da 'yan uwansa suke  daure mata gindi, saboda Nairori da Dalolin da suke  samu ta wajen Jarumar 'yar  tasu.

San nan K6asancewar Uwar bata  tare da mahaifin, babu abinda za ta iya sai  dai kawai ta zura mata na mujiya.

Sai  dai Shahararriyar 'yar  Jaridar nan, Hajiya Mairo Muhammad Mudi ta yi mamakin jin hakan, domin ita  ta ga  irin kamar  goyon bayan da wannan uwar  take bawa 'yarta a fili, da yanda  take halartar wasu  bukukuwa da 'yar, akwai mamakin ace wannan maganar ta fito ne  daga bakin mahaifiyar.

San nan wasu  ma sun dora  laifin kacokan kan malamai, wai  saboda sune suka tunzura ta, ta bi uwa duniya ta kara nausawa dajin Sambisar mawaqa da makada da masu  rawar dandi.

Koma dai me za a ce ko a rubuta, kamar  wanda suka shude kafin ta, za ta  zama tarihi nan gaba ba da jimawa ba.

Mu kuma duk abinda muka fada, ko muka rubuta ko muka aikata, mu tarar  da shi a littafinmu ranar kiyamah ba ragi  ko kari.

Su kuma Iyaye da Allah ya ba su amanar 'ya'ya, sun yi bayani a gaban Allah da Mala'iku da Mutane da Aljanu a farfjiyar Kiyamah.

Allah ka6 kare mu da zuriyarmu  daga zamiya, ka bamu ikon sauke amanar daka dota mana, ka sanyamu cikin bayinka nagartattu.

Source Zuma times