An Dakatar Da Limamin Masallacin Juma'a Na Sultan Bello Dake Jihar Kaduna

Kwamitin Masallacin Juma'a na Sultan Bello dake Unguwar Sarki cikin garin Kaduna, karkashin jagorancin shugaban kwamitin Sheik Hamisu Ya'u, ya bada sanarwar dakatar da babban limamin masallacin Sheik Abdulhameed Balele Wali daga limanci har abinda hali ya yi, tare da maye gurbin sa da Na'ibinsa, Malam Ibrahim Alaramma.

Kwamitin Masallacin ya dauki matakin dakatar da limamin ne biyo bayan wata hatsaniya da aka samu a masallacin a safiyar ranar Sallah lokacin gudanar da sallar idi a masallacin na Sultan Bello a ranar Litinin da ta gabata.
Hayaniyar dai ta samo asali ne sakamakon tashi da hadari da aka yi a ranar, dalilin da ya sanya aka bar filin idi aka koma cikin masallaci, ana cikin masallacin ne ruwan sama ya fara sauka, shi kuma Liman bai rigaya ya iso ba, sakamakon korafi da damuwar jama'a ya sanya aka bukaci Dakta Ahmad Gumi da ya bada sallah, yana cikin gabatar da sallar ne sai Liman Malam Balele Wali ya karaso, bayan an kammala sallah ne sai Dakta Gumi ya tashi domin gabatar da huduba, shi kuma Malam Balele Wali sai ya yunkura ya rike Daktan tare da kokarin hana shi karanta hudubar, lamarin da ya haifar da hatsaniya har wasu matasa suka kwashi Liman din suka yi waje da shi.
Da yake karin haske a gaban manema labarai shugaban kwamitin Sheik Hamiu Ya'u ya ce daukar matakin dakatar da limamin ya zama wajibi domin gudanar da kyakkyawan nazari tare da daukar matakin da ya dace a nan gaba.



source Rariya