Tsohon kwarto na kokarin kwace ’ya’yan mijin tsohuwar farkarsa

Wani magidanci mai suna Malam Muhammad Sani Najume da ke zaune a Federal Low Cost da ke yankin Usubu a garin Kwantagora ta Jihar Neja ya kai karar wani ma’aikacin asibiti mai suna Mista Kayode Adeyemi Stephen kan zarginsa da lalata da matarsa mai suna Suwaiba Aliyu Aski a lokuta da dama tare da kokarin kwace masa ’ya’yansa tagwaye biyu, bayan ya samu nasarar raba ta da shi.
Malam Muhammad Sani Najume wanda ma’aikacin gwamnatin Neja ne mai shekara 42, ya kai karar Adeyemi da surukinsa Alhaji Ibrahim danjuma Sarkin Aski bisa zarginsa da assasa badakalar da ta sa Mista Adeyemi ya yi ta lalata da matarsa a Kotun Shari’ar Musulunci da ke Unguwar Usubu a Kwantagora ne tun a ranar 22 ga watan Janairun bara, bayan da Mista Adeyemi ya yi ikirarin cewa ’yan biyun da matar ta haifar wa Najume masu suna Hassan da Husaini ’ya’yansa ne.
Najume ya shaida wa wakilinmu cewa, Malam Ada na Unguwar Yamma mijin mahaifiyarsa Hajiya A’i ne ya sanar da shi cewa Alhaji Gambara ya sanar da shi cewa “Matata Suwaiba Aliyu Aski da Mista Kayode Adeyemi Stephen sun samu Alhaji Adamu Mai Fatar Kada a gida sun bayyana masa cewa sun share shekara uku suna zina har ma ya yi ikirarin cewa cikin da matata ke dauke da shi ba nawa ba ne, nasa ne,” inji Najume.
Ya ce Mista Kayode, ya yi ikirarin kashe makudan kudi a kan matarsa inda duk wata yakan yi wa iyayenta hidima da suka hada da ba surukinsa Naira dubu 30 da buhun shinkafa da doya. Bayan haka, shi yake biyan kudin makarantar kanenta da wasu abubuwan da ba za a rasa ba.
Ya ce Alhaji danjuma ya tabbatar wa Alhaji Mai Fatar Kada cewa muddin Mista Kayode zai musulunta, shi kuma zai ba shi auren ’yarsa Suwaiba duk da cewa a lokacin suna da aure.
Sani Najume ya ce, “Bayan da na ji wannan jawabin, sai na kira surukina Alhaji danjuma Aski zuwa gidana da ke Federal Low-Cost domin ya tabbatar mini da gaskiyar maganar. Sai na je tare da dan uwanta Tijjani Sa’idu da daha da ’yar uwar mahaifiyarta Mama Larai Rafin Gora. Da muka hadu ne surukina ya sanar da ni cewa ba abin da ya samu aurena da matata, kuma cikin da take dauke da shi nawa ne. Idan ina son karin bayani in tambayi kowane malamin Musulunci da na sani.”
Ya ce bayan zaman ne ya samu Alhaji Adamu Mai Fatar Kada kan abin da ya faru, sai ya ka da baki ya ce masa ba abin da zai ce sai ya je da Alhaji danjuma da Alhaji Gambara da daha. 
Ya ce Mista Kayode ya yi hayar wani lauya mai suna Barista M.B. Shehu wanda ya je kotu domin a kashe aurensa da matarsa, bayan yana da masaniyar cewa na shigar da shi da matata da surukina kara domin bi masa hakkinsa. 
Mista Kayode Adeyemi mai shekara 43 da ke aiki a Hukumar Kula da Asibitocin Jihar Neja kuma aka tura shi garin Bangi a jawabin da ya yi wa ’yan sanda ya ce yana da mata mai suna Suwaiba Aliyu da ’ya’ya biyu masu suna Hassan da Hussaini kuma ya tabbatar da auren matarsa a ranar 9 ga watan Maris na bana, wanda hakan ya halalta masa ’ya’yan da yake ikirarin nasa ne.
Mista Kayode Adeyemi ya ce a shekarar 2012 ne bayan ya taso daga aiki a Babban Asibitin Kwantagora yana hanyar zuwa gida, ya hangi Suwaiba inda ya tsaya a mota domin rage mata hanya amma ta ki, sai ta tsayar da dan acaba, ya biya mata kudin da za a kai ta gida, kafin su rabu a wurin sun yi musayar lambobin waya.
Ya ce, “Bayan wata uku sai muka hadu a Babban Asibitin Kwantagora tare da wata. A nan na tambaye ta ina mahaifinta? Sai ta kwashe labarin abin da ya faru tsakaninta da mijinta inda ta nuna ya yi watsi da ita kuma ba ya kwanan aure da ita tun farkon shekarar 2012.”
Mista Kayode Adeyemi ya ce a shekarar 2013 ne shi da Suwaiba suka je wurin Baba Mai Fatar Kada a Unguwar Tudun Wada inda ta sanar da shi cewa babu aure tsakaninta da mijinta Sani Najume, saboda ya yi mata saki fiye da sau uku. Da ta gama yi masa bayani, bai ce komai ba, ya ce sai bayan ta haihu.
Ya ce a shekarar 2014 Sani Najume ya shigar da kara Kotun Majistare ta Kwantagora yana zarginsa da jan  hankalin matarsa, sai  dai lauyoyin Mista Kayode da na Sani sun nuna wa kotun za a sasanta lamarin cikin ruwan sanyi inda aka nemi ya biya Naira dubu 350 shi kuma ya kasa biyan kudin daga baya.
Kayode ya ce a ranar 9 ga Maris na bana aka daura musu aure da Suwaiba bayan da ya Musulunta. Kuma a wannan ranar Malam Sani Najume ya shigar da kara kotu bisa dalilin kin biyan kudin da suka nema a wurinsa. Sai dai ya ce kafin ya aure ta sai da ya tabbatar ta gabatar masa da takardar sakin da Najume ya yi mata, a Kotun Shari’ar Musulunci. 
Ita kuwa Suwaiba Aliyu Aski ta shaida wa ’yan sanda cewa suna da ’ya’ya uku ne da tsohon mijinta Najume da suka hada da Sulaiman da Rahinatu da kuma Muhammad Sani. Ta ce a watan Janairun shekarar 2009 ne ya ba ta takardar sakin da ba ta tuna inda ta ajiye ta ba. Sannan ya yi wani sakin a watan Disamban shekarar 2013, inda ta ce tana da shaidun da suka hada da Alhaji Na-Jummai da Maryam da Hajiya A’i game da lamarin.
Suwaiba Aliyu Aski ta ce, “Lokacin da ya yi sakin a shekarar 2013 ya ki ba ni takarda. Da na nemi haka,sai ya ce ba shi ba ne zai rubuta mini da hannunsa ba. Jin haka ne ya sa na je Kotun Shari’ar Musulunci domin ta kawo karshen aure tsakanina da tsohon mijina Muhammad Sani.”
Ta ce sun taba zuwa wurin Mai Fata domin shaida masa cewa Mista Kayode ya yi mata ciki wanda ya yi sanadiyyar haihuwar ’yan biyun da suka hada da Hassan da Hussaini, kuma ba ta san dalilin da ya sa yake gudun cikin ba. Dalili kuwa daga shekarar 2012 suka fara soyayyya da Kayode da har ya kai suke lalata a tsakanisu a duk lokacin da ta je gidansa. 
Suwaiba ta ce, “Mista Kayode ya Musulunta a watan Fabrairun bana, kuma ranar 9 ga Maris, bayan na biya Muhammad Sani sadakinsa Naira 172 da sauran kudin da ya nema. Shaidana shi ne Tijjani Sarkin Aski. Kafin a kai ga wannan matakin sai da na tabbatar Kotun Shari’ar Musulunci da ke Kwantagora ta raba aurenmu da tsohon mijina.”
Alhaji danjuma Aski mai shekara 55 ya shaida wa ’yan sanda cewa a ranar 16 ga watan Maris na bana da misalin karfe 2:40, surukinsa ya kai shi kara kotun da ta ba ’yan sanda umurnin gudanar da bincike game da lamarin inda ya zarge shi da hannu wurin ba wani ’yarsa (matar mai kara) ana lalata da ita alhalin tana da aure. “Ba yadda za a yi in aikata irin wannan danyen aikin da addini bai yarda da shi ba ko kadan,” inji shi.  
Surukin ya ce ya sha sasanta tsakanin surkinsa da ’yarsa daga bisani Suwaiba ta shaida masa cewa Sani ya sha furta mata kalaman saki, kuma daga bisani ta shigar da kara a Kotun Shari’ar Musulunci ranar 10 ga watan Satumban bara. 

Muhamma Sani Najume da yake kukan ana kokarin kwace masa ‘ya’ya

Wakilinmu wanda ya ziyarci Kwantagora ya samu takardar da Kotun Shari’ar Musulunci ta tabbatar da kawo karshen aure a tsakanin Muhammad Sani da Suwaiba Aliyu Aski ranar 10 ga watan Satumban bara. Wannan ne ya ba Suwaiba damar fara iddar daga ranar da ta amsa ta kammala sannan ta auri Mista Kayode.
Ganin Mista Kayode Adeyemi wanda yanzu ya musulunta kuma yake amsa sunan Kasim yana ikirarin cewa shi ya yi wa Suwaiba cikin da ta haifi ’yan biyu masu sunan Hassan da Hussaini ne ya sa Muhammad Sani ya garzaya Kotun Musulunci domin ta kwato masa ’ya’yan da ya yi ikirarin cewa nasa domin tsohuwar matarsa ta haife su a gidansa, kuma da suka cika mako daya ya yi musu zanen suna tare da yanka musu hakika yadda addinin Musulunci ya bukata.
Muhammad Sani ya ce zai bi duk hanyoyin da shari’a ta tanada domin karbo ’ya’yansa, inda ya ce ya tanadi shaidun da zai gabatar a gaban Kotun domin kawar da shakkun cewa shi ne mahaifinsu.