DALILAI 10 DA SUKA SA NA MUSULUNTA - Emmanuel Adebayor

Musulmi sun fi riko da koyarwar Al-Masihu fiye da Kiristoci ... Shahararren dan wasan tamaula (kwallon kafa) dan kasar Togo, Emmanuel Adebayor, ya watsar da addinin Kiristanci ya rungumi addinin Musulunci. A cewarsa ya lura cewa Musulmi ne suka fi koyi da kuma aiki da koyarwar Al- Masihu (Annabi Isah - A.S.) fiye da Kiristocin da ke bugun gaba da cewa Al-Masihun nasu ne. A wani faifan bidiyo da ya fitar a shafin YouTube, Adebayor ya rattabo dalilai 13 da suka sanya shi rungumar addinin Musulunci. Dalilan su ne: 1. Al-Masihu ya koyar da cewa Allah daya ne, kuma shi kadai ne abin bauta, kamar yadda ya zo a cikin Deut 6:4 da Mark 12:29. Haka ma Musulunci ya koyar, kamar yadda ya zo a cikin Qur'an 4:171. 2. Al-Masihu ba ya cin naman alade, kamar yadda ya zo a cikin Leviticus 11:7. Musulmi ma ba su cin naman alade kamar yadda ya zo a cikin Qur'an 6:145. 3. Al-Masihu yakan gayar da mutane da sallama, 'Assalamu alaikum,' kamar yadda ya zo a cikin John 20:21. Wannan ya yi daidai da dabi'un Musulmi. 4. Al-Masihu yakan yawaita fadar, 'In Allah ya yarda - In Sha Allah.' Kamar yadda koyarwar Musulunci take a cikin Qur'an 18:23-24. 5. Al-Masihu yakan wanke hannuwa da fuska da kafafunsa kafin yin duk wata ibada. Haka Musulmi ke yi kafin su yi sallah. 6. Al-Masihu da duk wasu Annabawa da aka ambata a cikin Bayibul (Bible) sukan yi sujuda ga Ubangiji, goshinsu a kasa (duba Mathew 26:39). Musulmi ma na sujuda ga Ubangiji kamar yadda ya zo a Qur'an 3:43. 7. Al-Masihu ya tsayar da gemu kuma yana yafa mayafi bisa kansa. Haka koyarwar Musulunci take, maza su tsayar da gemu, su rika yin rawani. 8. Al-Masihu yana matukar kiyaye dokokin Allah, ya kuma yadda da dukkan Annabawan da suka zo kafin shi (duba Mathew 5:17). Musulmi ma sun yadda da dukkan Annabawa (duba Qur'an 3:84 da 2:285). 9. Maryama, mahaifiyar Al-Masihu, tana sanya tufafin da ke rufe ilahirin jikinta, kuma ta rufe kanta da mayafi, kamar yadda ya zo a Timothy 2:9, Genesis 24:64-65 da Corinthians 11:6. Haka matan Musulmi kan yi irin wannan shigar kamar yadda ya zo a Qur'an 33:59. 10. Al-Masihu da wasu Annabawa da aka ambata a Bayibul, sukan yi azumi na kwanaki 40 (duba Exodus 34:28, Daniel 10:2-6 da Mathew 4:1). Haka Musulmi kan yi azumin kwanaki 30 a watan Ramadan (duba Qur'an 2:183), wasu ma har sukan kara da azumi 6 bayan watan Ramadan domin neman karin lada.